კომპანია "თელასმა" ცენტრალური რაიონების ელექტრომომარაგების საიმედოობა გაზარდა

კომპანია „თელასმა“ ქვესადგურიდან „თეც“ გამომავალი ცენტრალური გამანაწილებელი პუნქტების ცგპ №6000 და ცგპ №6025 სარეკონსტრუქციო სამუშაოები დაასრულა. აღნიშნული ქვესადგური 25 300 აბონენტის, მათ შორის პარლამენტის, სახელმწიფო კანცელარიის, სამედიცინო დაწესებულებების ელექტრომომარაგებას უზრუნველყოფს.

ორივე ცგპ-ში განხორციელებული ტექნიკური გადაიარაღების სამუშაოების შედეგად, 70 მოძველებული 6 კილოვოლტიანი უჯრედი ზეთიანი ამომრთველებით შეიცვალა თანამედროვე უჯრედებით, რომლებიც აღჭურვილია ვაკუუმური ამომრთველებით და მიკროპროცესორული სარელეო დაცვით, რაც თბილისის ცენტრალური რაიონების - მთაწმინდა, ჩუღურეთი და დიდუბე - მოსახლეობის და სასიცოცხლო მნიშვნელობის ობიექტების ენერგომომარაგების საიმედოობას და ხარისხს არსებითად აამაღლებს.

სს „თელასის“ საინვესტიციო პროგრამის ფარგლებში, ცრპ-ების რეკონსტრუქციაზე დახარჯულმა თანხამ 1 193 000 ლარი  შეადგინა.

ქვესადგურიდან გამომავალი ცგპ-ების კომპლექსური მოდერნიზაცია განხორციელდა ავარიული გამორთვების ლოკალიზაციისა და ქსელის სხვა ნაწილებზე დაზიანების გავრცელების პრევენციისათვის. ქვესადგურის „ტეც“ ძლიერ ამორტიზებული მოწყობილობებისა და აღნიშნულთან დაკავშირებით ამომრთველებისა და სარელეო დაცვის მოწყობილობების ხშირი მტყუნების გამო, საკაბელო ხაზში დაზიანების წარმოქმნისას, ითიშებოდა მეზობელი საკაბელო ხაზებიც. აღნიშნული ქვესადგური არ არის სს „თელასის“ მფლობელობაში, ამასთან „თეც“-ის მესაკუთრეების მიერ მოწყობილობების რემონტი არ ჩატარებულა.

გახსნის ცერემონიას ესწრებოდნენ საქართველოს ენერგეტიკის მინისტრის მოადგილე ილია ელოშვილი, სსს „ინტერ რაო“-ს სტრატეგიებისა და ინვესტიციების ბლოკის ხელმძღვანელი, გამგეობის წევრი ილნარ მირსიაპოვი, სსს „ინტერ რაო“-ს ცენტრალურ აზიასა და ამიერკავკასიაში აქტივების მართვის ბლოკის ხელმძღვანელი დიმიტრი ვოლკოვი, სსს „ინტერ რაო“-ს საზოგადოებასთან ურთიერთობის დირექტორი, საინფორმაციო პოლიტიკის ბლოკის ხელმძღვანელი ანტონ ნაზაროვი და სს „თელასის“ გენერალური დირექტორი სერგეი კობცევი.

კომპანია „თელასი“ მომავალშიც აპირებს განახორციელოს პროექტები, რომლებიც მიზნად ისახავენ ქსელის მუშაობის ეფექტიანობის და საიმედოობის ამაღლებას.

 

***სს „თელასი“ ერთ-ერთი მსხვილი კომპანიაა საქართველოში ელექტროენერგიის დისტრიბუციის დარგში, რომელიც ახორციელებს ელექტროენერგიის განაწილებას თბილისში. კომპანია ელექტროენერგიას აწვდის 500 ათასზე მეტ მომხმარებელს. 2003 წლის აგვისტოში სს „თელასი“ „ინტერ რაო“–ს შემადგენლობაში შევიდა. „ინტერ რაო“-ს მფლობელობაშია „თელასის“ აქციათა 75%, ხოლო 25%-მდე სახელმწიფოს საკუთრებაა.

***ჯგუფი „ინტერ რაო“- დივერსიფიცირებული ენერგეტიკული ჰოლდინგია, რომელიც რუსეთსა და მის საზღვრებს გარეთ ელექტროენერგეტიკის სფეროს მრავალ სეგმენტში მონაწილეობს. კომპანიას რუსეთის ელექტროენერგიის იმპორტ-ექსპორტის დარგში ლიდერის პოზიცია უკავია, მისი წილი აქტიურად იზრდება გენერაციის და რეალიზაციის სეგმენტებში, ასევე ავითარებს ბიზნესის ახალ მიმართულებებს. „ინტერ რაო“-ს სტრატეგია მიმართულია გლობალური ენერგეტიკული კომპანიის შექმნისკენ, რომელიც მსოფლიო ენერგეტიკული ბაზრის ერთერთი გადამწყვეტი მოთამაშე იქნება. „ინტერ რაო“-ს ჯგუფის შემადგენლობაში შემავალი ელექტროსადგურების დადგმული სიმძლავრე 35 გიგავატს შეადგენს.